مش عارفه ليه في حالة تخبط شديدة اليومين دول بسبب حكاية البنت المصرية الي اعتدي عليها – افراد من الشرطة العسكرية - بالضرب والسحل والتعرية .
( يلا خليها افراد بس عشان الي في صف الجيش يكمل قراية للاخر من غير ما يتعصب )
الموضوع دلوقتي مش انت مع الجيش ولا ضده
ابسوليوتلي
الموضوع دلوقتي خد شكل تاني ..
انت بني ادم يعني ولا نص نص ؟
طيب انت بتتقي ربنا ف رأيك ولا نص نص ؟
مممم
طيب بالمنطق كدا ..
ليه مش قادر تصدق ان البنت دي بريئه
ليه مش قادر تعترف جوه نفسك كدا ( اه هو الجيش حمى الثوره صحيح ..وميه ميه ... بس الصراحه التصرف دا غلط مكنش المفروض يحصل )
دا يعني لو انت مؤيد للحكم العسكري مش دي نقطة الخلاف دلوقتي ..
انت عارف انت لما تقول البنت دي تستاهل الي حصلها اصلها مكانتش لابسه هدوم تحت العبايه ( مع ان الي بيقول كدا عارف كويس ان دا مش معقول اصلا وان كان فيه بدي تحت العبايه بس هو بيهزر :) )
عارف لما تقول كدا بالظبط زي ايه ؟
تنزل مع اختك تشتري لبس
حلو دا ؟
اه جميل جدا .. اشتريه
وتقعد اختك تلبس الطقم سنه
ولو جم قالولك الحق ... البلطجيه بهدلوا اختك
دمك يحمى وتروح تجيب حقك وحقها
تلاقي سنجه و دبشه وزقلط و3 حيطان سد وعمود نور ف وشك
تروح باصص لاختك كدا ورافع ايدك لفووووووق ..
وهووووب ..
رازعها قلم ..
ما انتي الى ماشيه متقمعه يا ست هانم !
وتبوس ايد زقلط وتمشي
( تشبيه درامي صحيح ولا كأنه ست كوم ) بس الصراحه لايق :)
اصل مش معقول يعني يكون في ناس مقتنعه من جواها ان العساكر دول ما غلطوش وان البنت هي الي غلطانه ..
طب دي غلطانه ؟
الي يقولك نازله ليه ؟
بذمتك طيب مش مكسوف تسأل السؤال دا ؟
ولا هي طول ما الحكايه ماشيه تمام يبئا الولاد والبنات ايد واحده .. وشباب الميدان كانوا بيحموا بعض .. ويلا يا مصريين انزلو مليونية حماية اي حاجه ... وكلنا الشعب وكلنا شباب 25 يناير
وساعه ما يحصل حاجه لبنت انت يالي اسمك راجل مقدرتش تحميها ولا تردلها كرامتها تقوم قالب عليها وايه الي نزلك وايه الي لبسك كدا اصلا ..
وتبوس ايد زقلط وتمشي !
طب مش عيب اخواتنا المسيحيين يحسوا بيها و انت كمسلم تشتمها ؟
طب مش عيب الاجانب يتهز جواهم حاجه من المنظر ( وهما الي اساسا بيمشوا كدا ف الشارع عادي ) .. وانت كمسلم تشتمها ؟
طب مش عيب عليك تشتم الي يعاكس خطيبك وهي ماشيه معاك وتحميها .. وتيجي على دي وتشتمها ؟ تفرق عنها ايه يعني ؟
ولا احنا هنمشي بنظرية
- امك دي ؟
- تؤ
- امك ؟
- تؤ
- امك ؟
- تؤ
- تماااااااام
_ اكيد واحد من الي بيقروا دلوقتي هيطلع يقولي انا اختي ولا خطيبتي مش هتنزل مظاهره وتتزنق في وسط الناس وتقف قدام عسكري يعمل فيها كدا _
ممممممم
طب مش دا ممكن يحصل وهي ماشيه ف الشارع عادي ؟
ركز معايا بس ما احنا لازم نفرق بين نقد التصرف ونقد الموقف
احنا مش بننقد الموقف احنا بننقد التصرف نفسه الفعل نفسه هل دا فعل قوه وجيش حاكم البلد انه يعمل في البنات كدا ؟؟
لكل واحد بيعيب في البنت دي احب اقول حاجه
الرسول علية الصلاة والسلام قال ( فليقل خيرا او ليصمت )
يا تقول ربنا يسترها عليها وعلى نساء المسلمين جميعا
يا تصمت من غير ما تعيب في حد
لان ليك زوجه في علم الله
خلي ربنا يحسنلك اخلاقها بحسن اخلاقك
والى اختي في الله
الي عملوا فيكي كدا غلطوا
لو كنتي صح غلطوا
لو كنتي غلط فهما برده غلطوا
لان لو كان حصل ايه .. مش دي طريقة العقاب ولا الحساب
عشان كدا بنقول .. اتقي الله ف رأيك ..
مش معنى ان واحد جعان نحلله السرقه ..
ولا واحد اتسرق منه حاجه نحلله القتل ..
ومش معنى انها نزلت المكان لاي سبب انك تحلل الي حصلها
مش كدا ولا ايه ؟
ويا ريت الي مش عاجبه الكلام ميشتمش فيها ويحط احتمال واحد ف المية انه ممكن يكون عنده سوء فهم ويتضحله بعد كدا انها مظلومه
وميحطش نفسه ف خانة عقاب قذف المحصنات
فقد قال جلّ و علا : ( إِنَّ الَّذِينَ يَرْمُونَ الْمُحْصَنَاتِ الْغَافِلاتِ الْمُؤْمِنَاتِ لُعِنُوا فِي الدُّنْيَا وَ الآخِرَةِ وَ لَهُمْ عَذَابٌ عَظِيمٌ ) [ النور : 23 ]
عشان الميزان مش ناقص ذنوب بس
( مقدرتش اختم من غير ما احط صورة الراجل دا :) )
