انا هسأل سؤال .. وانا تقريبا عارفه الرد عليه ..
كام واحد مننا لما فتح بروفايل الشهيد علاء عبد الهادي بعتله فريند ريكوست ؟؟ ولا بعتله رساله مكتوب فيها الله يرحمك !!!
بأمانه .. ؟
الي عمل كدا مش مجنون ولا عبيط زي ما الناس فاكره
الي عمل كدا بني ادم لحم ودم وبيحس
تصدقوا ؟
الي معلمش كدا هو الي مش طبيعي !
ايه الجنان دا
وتبعتله فريند ريكوست ليه ؟؟ هو هيقبله ؟ ولا هيشوفه حتى ؟
-لأ
بس اعتقد كل واحد مننا من جواه حاسس احساس غريب .. لو واحد ولا واحده استشهد وقالولك دا كان قدك ف السن ومن بلدك دا مش بعيد كان قاعد وراك ف المدرسه ف اعدادي وغشيت منه سؤال النحو .. ومشيتوا ومشفتوش بعض تاني .
ولا اتكلمتي مره معاها في الدرس وهي قاعده جمبك واتريقتوا على رخامة مدرس الفيزياء وضحكتوا .. ومشيتوا ومشفتوش بعض تاني .
دا كان ساكن ف الشارع بتاعك يعني ممكن تكون قابلته مره ف السوبر ماركت وانتو الاتنين بتمدوا ايديكوا على اخر كيس شيبسي .. وابتسامه طيبه وكل واحد فيكوا يتحايل ع التاني ياخده .. ومحدش فيكوا خده عشان يسيبه للتاني .. ومشيتوا ومشفتوش بعض تاني ..
ولا ركبتي معاها التاكسي وانتوا متعرفوش بعض ومكنش معاكي فكه وحلفت تدفعلك .. وحفظتي شكلها وبينك وبين نفسك ناويه ترديلها الفلوس .. ومشيتوا ومشفتوش بعض تاني .
اول ما هتشوف صورته ولا صورتها .. وعليها الخط الأسود اياه .. هتتهز جواك حاجه كبيره .. هتلاقي نفسك بتتنطط وعنيك مبرقه .. يا نهار ازرق ! دا هو ! دي هي !!
دا .. دا .. دا انا اعرفه ! اعرفها كويس اوي !!
اساسا حتى لو متعرفوش هتحس بالإحساس دا
لو فتحتي بروفايلها ولقيتها عامله لايك لصفحة انتي فيها .. وحطه ستيتس انتي ف يوم من الايام حطيتيها
لسه من كام ساعه كاتبه لصاحبتها كومنت فيه ضحكه وفيه الوش السمج دا (^_^) الي انتي بتعمليه ع الفاضيه والمليانه .. لكنها دلوقتي خلاص مش موجوده ومحدش هيرد ع البوست الي حطاهولها صاحبتها بتسألها على معاد المحاضره بكره ..
مش هتبعتليها فريند ريكوست ؟
لما انت عارف انه زميل ف نفس كليتك .. و تلاقي الوول بتاعة عليه ستيتس بيشتكي من غلاسة البارا ورخامة الفارما .. وتبص على مكتبك تلاقي كتاب الفارما مفتوح
مش هتبعتله فريند ريكوست ؟
عارفين ليه
عشان كل واحد فينا بيكون نفسه يحس بحاجه من جواه تديه فخر انه كان ف يوم من الايام يعرف الناس دي .. ولا حتى مره اتكعبل ف الاكونت بتاعهم ع الفيس ولا عمل بوست وحد فيهم رد عليه وقاله حلوه يا باشا ولا تسلمي يا جميل
فجأه كدا بتبقى الكلمه غاليه اوي
واللايك الي عملهالك دي فخر نفسك تحطها صورة لبروفايلك
والله دي مش تفاهه – للناس الي بتقول ايه الهيافه دي –
دي فعلا حاجه انسانيه جوانا ان نفسك تحس انك كنت صاحبه او حتا فريند ليه ع الفيس .. مع ان ممكن يكون كنت بتشوفه كل يوم موجود ومفكرتش قبل كدا تكلمه .
عارفين ايه اكترحاجه هتأثر فيكوا ؟؟
انك تتخيل ان البني ادم دا كان قاعد ع الفيس من كام ساعه زي ما انت قاعد دلوقتي كدا
وبيقرا ستيتسات وبيعمل لايكات وبيرد ع البوستات وبيكتب كومنتات .. زي ما انت ما بتعمل دلوقتي كدا بالظبط
ونزل عشان يعمل حاجه هو مقتنع بيها وبحسن نيه نازل يشوف ايه الي بيحصل ويطمن على حال بلده ويعبر عن رأيه ويساعد المصابين ويطلبلك حقك كمان .. و من جواه نازل وسايب فريند ريكوست متعلق لما ييجي هيقبله .. ولا بوست كدا صاحبتها بتقولها انا زعلانه منك ومرضيتش ترد عليها عشان لما تيجي تتكلم معاها وتعاتبها برواقة .. بس نزلوا مرجعوش .. :(
يمكن كانوا عارفين انهم مش هيرجعوا .. بس الأكيد ان لو انا مكانهم .. اكيد مكنتش هكون عامله حسابي اني هنزل مش هرجع .. طبقا لقاعدة مهمه هي – يحدث للآخرين فقط –
لأ خلاص بئا
اعمل حسابك ان الاخرين دول ممكن يكون صاحبك الي معاك ع الشات دلوقتي
ولا اخوكي الي قاعد بيذاكر ف اوضته
ولا اختك الي لسه متخانق معاها وهتلاقيها جيبالك كوباية الشاي دلوقتي وبتقولك خليك فاكر الجمايل دي
اقولكوا على حاجه تانيه
هو انت كمان مش اخرين بالنسبه لحد تاني ؟
خلاص لو هتطبق القاعده دي
فاعمل حسابك ان ممكن تكون انت العبره الجايه الي هنتعظ بيها كلنا
اعمل حسابك انك تحاول ترجع حق الناس دي عشان لو بقيت مكانهم ف يوم تلاقي الي يجيبلك حقك .
عشان ع الاقل يقبلوا الفريند ريكوست بتاعك .. ويشفعولك يوم القيامة .. !
الصراحه
لكل الناس الي حسه ان الكلام دا تفاهه
يمكن الصورة دي تكون دليل على ان في ناس كتير حست كدا !!
لروح كل الشهداء من أول يوم 25 يناير 2011 ولحد يوم استقلال مصر .. اسألكم الفاتحه .
اللهم اكتبه مع الشهداء والصديقين........جزاك الله خيرا